À la une

Ansyen prezidan Michel Jozèf Mateli mande mò Jovenel padon

image

Nan yon videyo ki dire 6 minit ak 24 segonn, patwon politik Jovnèl Moyiz la, ansyen prezidan Michel J. Mateli, pa kenbe mo nan bouch li. Li konsidere asasina ki fèt la, kòm yon sakrifis.

Videyo sa kap sikile sou rezososyal yo depi yè nan aswè madi 20 jiyè a, montre aklè, yon Michel Mateli ki atriste aprè zak asasinay sa ki fèt sou prezidan ke li menm, li te al chèche pou mete sou pouvwa.

Ansyen prezidan Tèt kale a, remèsye ansyen chèf leta peyi a, pou rèv, kouraj ak detèminasyon li te gen pou l te dirije. Li fè konnen, ke lanmò sa fè moun plis wè aklè ke batay politik Jovnel Moyiz tap mennen an pat fasil. "Ou pat pè denonse, sa nou tout, nou tap plenyen tou ba. Ou pat pè afwonte, sa kap detwi nou depi lendepandans. Ou rive nan sous pwoblèm lan. Nèg yo reyaji, yo kraze w ak katouch". Sou mo sa yo, ansyen prezidan Mateli, fè konprann aklè ke lanmò Jovenel la, se yon sakrifis.

Li kontinye diskou l la, pandan l fè konnen ke zak sasinay sa louvri je pèp la plis sou vrè lennmi l yo, e lap mete tout moun ki konsène yo sou ban touch. Ak yon kadans ki trè kalm, li raple mesaj linyon ke prezidan Jovnel te konn ap preche yo "Nou tout ladan l"! Konsa, li pwomèt ke batay la ap kontinye e yo pap fè bak.

Nan sans sa, li mande padon ak fanmi Jovnèl Moyiz, madanm li ak pitit li. Objektif ki fè l te al chèche l la, se pat pou l te rive jou k nan lanmò l. "Nou pat vle pitit ou pèdi w, nou pat vle madanm ou pèdi w, nou pat vle pèdi w, nou pat vle w pèdi lavi w".

Selon Michel Mateli, fason anpil moun nan popilasyon an te manke konprann aksyon politik Jovnel Moyiz yo, pèmèt ke moun ki te gen lide l asasinenl yo, fè sa pi vit. Konsa, yon ti padon pou tout moun: pou sa ki te manke konprann li yo, pou sa ki asasinenl yo.

Solèy la, dlo a, ki te fè pati pwogram kanpay Politik prezidan Jovnel Moyiz yo ebyen Mateli fè konnen ke anyen pap ka kanpe pwojè sa yo, ak moun ki dèyèl yo.

Li plenn, pou l di: "Ayiti pèdi yon pitit gason, yon pitit anplis. Lyon an pa mouri, se dòmi, lap dòmi". Nap fè konnen tou, ke ansyen prezidan Mateli, se maten an li rantre nan peyi a, pou l ka patisipe nan fineray Jovnel Moyiz la.

Exodenews la pou enfòmew !

image

Oberde Charles

Rédacteur

Laisser un commentaire




Der Prinz Dorco

Eske pat gen posiblite pou mete videyo a tou?
Deja map felisite nou deske travay nap fè a pa pito. Kenbe la

21 Juillet 2021